काठमाडौं । भूमि व्यवस्था, सहकारी तथा गरिबी निवारण एवं संघीय मामिला तथा सामान्य प्रशासन मन्त्री प्रतिभा रावलले नेपालका लागि चीनका राजदूत Zhang Maoming सँग शिष्टाचार भेटवार्ता गर्नुभएको छ।

मन्त्रालयमा सम्पन्न भेटका क्रममा नेपाल–चीन द्विपक्षीय सहयोगका विविध विषयमा विस्तृत छलफल भएको थियो। विशेषगरी चीनको स्वशासित क्षेत्र सिजाङ सरकारको सहयोगमा सञ्चालन भइरहेको Project Aid to Nepal, सिभिल अस्पतालको स्तरोन्नति, अस्पतालमा क्यान्सर उपचारका लागि CAR T-Cell Laboratory स्थापना तथा भूमि प्रशासनको डिजिटल रूपान्तरण (Digitalization of Land Administration) लगायतका सहकार्यका विषयमा विचार–विमर्श भएको मन्त्रालयले जनाएको छ।

भेटका क्रममा राजदूत Zhang Maoming ले मन्त्री रावल नेतृत्वको मन्त्रालयले सरकार गठनपछिका पहिलो १०० दिनमा हासिल गरेका कार्यप्रगतिप्रति प्रशंसा व्यक्त गर्नुभएको थियो। उहाँले सेवा प्रवाहमा सुधार, भूमि प्रशासनको डिजिटल रूपान्तरण तथा सुशासन प्रवर्द्धनका क्षेत्रमा मन्त्रालयले अघि सारेका पहलहरू प्रभावकारी र सकारात्मक रहेको उल्लेख गर्नुभयो।

सरकार गठनपछि पहिलो १०० दिनका उपलब्धिलाई प्राथमिकताका साथ अघि बढाइरहेकी मन्त्री रावलले नेपालका लागि चीनका राजदूत Zhang Maoming सँग पहिलोपटक औपचारिक शिष्टाचार भेट गरी द्विपक्षीय सहयोगलाई अझ प्रभावकारी बनाउने विषयमा छलफल गर्नुभएको हो।